"يـوميآت طـآلب مفصـول" قصة بحرانية

السلام عليكم ورحمه الله وبركاته


قد جئناكم اليوم ونحن حاملين لكم قصة قصيرة قد كتبناها بقلمنا المتواضع قصة تحكي عن شاب مراهق في مقتبل العمر يهدر ويعرض حياته للانحراف والخطر والفساد وذلك بعد فصله من المدرسه لكثرة مشاغبته فيها ومشاكله مع الطلبة والمدرسين ولكن الى ان يهتدي الحال سوف يرى ويتعلم من الحياة ما قد يرشده للطريق الصواب .

تعريف بأبطال القصه:

( ابوحمود ) : رجل كبير عمره تجاوز 80 حالته المادية ضعيفه جدا يعمل في احد المزارع كفلاح يحصد الارض .



( ام حمود ) : امرأة كبيرة ولكن صحتها قويه عمرها 65 عام اميه لا تعرف الكتابه ولا القراءة .



( جلول " جليله" اخت حمود ) : طالبه في المرحله الثانويه وهي طالبه متفوقه تدرس باجتهاد لكي تتخرج ويكون لها مستقبل ترضى فيه وتساعد به اسرتها الفقيرة .



( حمود ) : بطل القصة شاب مراهق فصل من المدرسه وهو لم يكمل الصف الثالث متوسط لتعديه على احدى المدرسين بالمدرسه وضربه ويلقب بــ " جماع القواطي " .



( سلوم ) : صديق حمود وايضا من عائله فقيرة ولكن يملك افكار شيطانيه ويعفس بلد بها ويلقب بــــ " بقعه الزيت " .


اما اللأن نبدأ بسرد القصة.

مع تمنياتي ان تعجبكم....
.................................................. .............................................

الجزء الاول
وقف عند باب البيت وهو يحمل ورقه الفصل النهائي من المدرسه ويقول في نفسه : الحين يا ويلي ادا دخلت البيت وحصلت امي قاعدة ..... ما بتلجيني من الهدرة وما بتخلي دعوة الا بتنزلها وبتدعليها عليي ..... ادري ابها انا ..... وبعد جاي من المدرسه من وقت .... اكيد بتشك في السالفه .... ما اليي الا اجدب عليها جدبه وهي جدي جدي ما تعرف تقرا ولا بتدري هادي ورقه ايشو الا في ايدي .



دخل وفي نيته يلعب لعبه على امه .... تفكه من اسالتها الي ما تخلص وهدرتها . فتح الباب وصكاه بالعدال وقام يمشي على اطراف اصابع رجوله علشان .... ما يطلع صوت يخلي امه تشك وتدري ان في احد في البيت ....... وفجأة !



( ام حمود ) : حمــــــــــــــود ؟؟؟؟؟؟؟؟؟!!!!!!! ويش تسوي يالادمر هني ؟؟؟؟ ما تقول اليي لويش ما رحت المدرسه ؟ تعال هني خلني اراويك شغل ربي تعال يا طايح النصبه والدات .



( حمود ) : هـــــــا ..... لا اماه ... بس احنا اليوم استادنا غايب وقالوا الينا المدرسه روحوا بيوتكم استريحوا ما في دروس اليوم .... الظاهر اماه ان الاستاد مريض عدل ...... رايحه عليه ..... متهاوش ويه مرته وفلتت عليه نعال زنوبه على عيونه وبطتها ..... مسكين ما يقدر يجي المدرسه ... واحنا عطونا ورقه كاتبين فيها ان عندنا اجازة لمدة شهر .... حتى اطلعي هكوا الورقه عندي تبين تشوفينها ؟



( ام حمود ) : تتبهلل عليي يا اللي ما تستحي على وجهك ... من وين اليي اعرف اقرا اني ؟؟؟؟ لكن جيب الورقه بطلعها بشوف ويش سالفتهم هالمدرسه ..... ما اصدق يعطونكم اجازة شهر .



( حمود ) : هاش جودي اقري عدل ... اجازة شهر مو تنبهيني باجر للمدرسه هداني قلت ليش .



( ام حمود ) : اي صدق اكو مكتوب ان الاستاد على عمري مفلوع بالنعال هههههههه استحوا يقولون متهاوش ويه مرته ...... اي فضيحه يقولون متهاوش خلوه مريض بس .



( حمود ) : اماه ..... الورقه مقلوبه جيفه قريتينها ههههههههههههه ....... وفاني شي انا ما اجدب عليش قلت ليش عندنا اجزة خلاص المفروض تصدقيني .



( ام حمود ) : انزين .... انزين .... لا تسوي اليي الحين سوالف وتسبل ...... اني بطلع بيت ام حسوون .... وادا ادن برجع البيت زين ؟



( حمود ) : اوه من متى تقولين اليي وين انتين رايحه .... المهم .... اماه انا بروح انام بس لين رجعتين لا تقولين لاحد مفل ابويي يعني ... ان المدرسه عاطينا اجازة بعدين الوزارة تدري ويحبسون مديرنا .... مو زين يعني نقطع برزق الرجال اماه .



( ام حمود ) : لا لا فيها سجن ... مسجين المدير خوش رجال عاطنجم اجازة ومريحجم .... ما بقول لاحد خلاص .



دخل حمود حجرته وهو متشقق ... قدر يجدب على امه وفلت من الهدرة اليوم والزنه على راسه .... بس الله يعينه لو درت عن سالفه الفصل . توه منبطح على المرقد جان يسمع صوت تفلع حجارة على الدريشه ... " ههههههههه هاده اكيد سلوم بقعه الزيت جاي اليي .... قايل اليه الف مرة لا يفلع حجارة على الدريشه .... بيكسرها اليي وابويي بدفعني ثمنها من خرجيتي ..... لا بارك الله فيه " .



نزل تحت البيت وفتح الباب ....... لقى سلوم واقف كشته رايحه عليها .... شكله قاعد من النوم ..... ههههههه قطع هالشكل نعال حمامات وقميص زراراته نصها مو في محلها والصروال قاحص لفوق جوزة الرجول .



( حمود ) : هههههههههههههه هلا هلا هلا والله ببقعه الزيت .... ها ويش مجيبنك هني ؟؟؟ مو انته اليوم مريض ولا جيت المدرسه لاه ؟؟؟



( سلوم ) : لا اي مريض ... انا اليوم سويت سوايا ... رحت المدرسه وانخشيت تحت سيارات الاساتده .... وفششت التواير واحد واحد ....... طلعت حرتي مالت امس .... عجل من يدخل استاد قال اليي قوم اوقف ورى يالغشاش .... كاني الوحيد الا يبرشم في الامتحانات ..... ما صارت هادي ..... قلت انتقم منهم وبشوفون ازيد بعد .



( حمود ) : هاااااااااااااااا ...... الحين عرفت منهو الا فشش التواير وقلب علينا المدرسه اليوم .... طلعت انته بقعه الزيت !!! اه منك عليك افكار ....... بس تدري ان عاقبوا صبيان المدرسه نصهم ... وانا منهم .... وقالوا الي ما يعترف من الي فشش التواير بنخلي الشرطه تجي وتجين وياها جلاب اطلع المجرم ..... بس ما في احد اعترف .... والمدرسه قالبه عفسه فوق تحت .



( سلوم ) : هههههههههاااااااااااي ..... حريمهم يعرفوني لو يصيدوني ..... بس قول زين ان عملتي نجحت وجابت نتيجه .... خلهم يستاهلون ....... الا تعال جماع القواطي .... صدق الا سمعته من امك الحين ؟



( حمود ) : ويش سمعت بعد ؟؟؟



( سلوم ) : وانا طايف على بيت ام حسون .... سمعت صوت امك يلعلع ...... تقول ان المدرسه عاطينا اجازة شهر لان استادنا مريض .



( حمود ) : طالع هادي الا بتفضحنا بعد ...... لا مو صدق .... اليوم تهاوشت ويه استاد ابو خنفر...... وضربته وبطيت عيونه .... قاموا فصلوني ..... ويوم رجعت البيت قلت لامي ان ورقه الفصل هادي اجازة شهر ..... لان استادنا مريض والمدرسه اليوم رجعونا من وقت و ما في دروس .



( سلوم ) : ههههههههه خطير انت ما اقدر عليك .... والحين ادا درى ابوك ويش بتسوي ؟



( حمود ) : لا تخاف ما بيدري .... من بقول اليه يعني ... الا اذا امي فتحت بوزها وهاده انا مهددنها .... ما تعرف تسكت دقيقه .... وادا درى نحصل الينا جم خبصه واسبوع على المرقد في البيت ...... وبعدين نقوم ما فينا شي كانا العافيه .... سهله يعني لا تحاتي .................................................. . .............................................


الى اللقاء في الجزء الثاني

من يوميات طالب مفصول

الجزء الثاني



( سلوم ) : اقول جماع القواطي ... امشا نروح نجمع لينا جم قوطي نترزق منهم .



( حمود ) : اي والله فكرة .... بدال ما احنا قاعدين اهني لا شغله ولا عمله ..... كل واحد راز الفيس للثاني ..... قابليني قابلتش العافيه ..... امشا اقول امشا .

وتوهم بيطلعون من الباب ..... جان يطلع ابو حمود في وجههم .... وهم كل واحد تخزبق .... ما عرف شيسوي .



( ابو حمود ) : هــــــا .... الا اشوفكم هني ؟؟؟ ما رحتون المدرسه ؟؟؟؟ ليكون غايبين عنها يا طايحين الحظ .... ما فيكم الا راس القوطي والعيون المبققه في الحصص .... والا هو ادا رحتون لو غبتون نفس الشي .



( حمود ) : لا ابويي .... احنا اليوم عندنا رحله ورجعونا من وقت .... واجد استانسنا هناك ... ودونا ابويي العرين .... شفنا التيوس والغنم والبط .



سلوم بينه وبين نفسه : الله يستر .... ما ناقص الا يقول شفنا البقر والثيران ..... انا ادري من وين يجيب هالشلخ كله !



( ابو حمود ) : اي اي .... لا ادا جدي عجل مسامحه غلطنا عليكم ..... اي بعد يوليداتي كل شي ولا الدراسه .... هي مستقبلكم ... وادا ما اهتميتون فيها باجر تكبرون وما تحصلون نفسكم .



مرة ثانيه سلوم ويه نفسه يتحلطم : ولا القهر ابوه يصدقه بعد .



( سلوم ) : لا تخاف عمي ... احنا كل شي ولا المدرسه ... هي مفل ما قلت مستقبلنا .... لا توصي حريص .



( حمود ) : يالله ابويي ....... تبغى شي ؟؟ احنا طالعين شوي قبل الادان وبعدين بنروح المسجد .



( ابو حمود ) : لا يا خلف جبيداتي ... لا يا غناتي ... ما امبي شي الا سلامتكم .... اتحملوا بروحكم زين .



( سلوم وحمود ) : يالله مع السلامة .



طلعوا برى الشارع ...... وكل واحد حاط ايده على صدره وينافخ من الخوف .... الحمدلله ما اكتشف شي ولا عرف شي .... اشوة مرت سليمه ... جان رحنا فيها .



( سلوم ) : هــــا .... ما شفت البقر والحمير والحصنه في العرين انتا بعد ؟؟



( حمود ) : اشششششششششششش ..... اسكت فضحتنا ..... الله يفضحك قول امين يالاثول ..... كله تتحلطم وبس ..... ويش تبيني اقول اليه يعني .... انا مفصول عن المدرسه لان متهاوش ويه الاستاد ..... وباط عيونه عساها ما تبرى ان شاءالله ..... وهذا سلوم المدرسه قالبين عليه الدنيا يدورونه .... لانه مكسر سيارات الاساتده ؟؟؟؟ ويش حلاوتي والله وانا اقول اليه جدي .



( سلوم ) : انزين انزين ... لا تقعد تتفلسف علينا ..... اسكت وانته منجب وامشه قداميني .... خل نجمع لينا جم قوطي نفس راسك المحلي نترزق منه .



( حمود ) : ويش ويش ويش ويش .... عيد لو سمحت .... يش تقول ؟؟ منهو راسه القوطي المحلي يا بقعه الزيت .... لكن ما عليه روح بروحك مانه جاي وياك .



( سلوم ) : لا لا لا ..... اسفين حبيبي .... حقك علينا يا ابو المزاقريت ..... كل شي ولا زعل الحبايب .... انا الا ما استحي وانا الاثول ... انا راس القوطي مفل ما قال ابوك .... اي ما فينا شده على زعلك .



( حمود ) : اي ... هاده الحجي السنع ..... مو من ساعه مسمتني سب وانا اخوك .... يالله امشا اهو لا يادن الحين .



( سلوم ) : الحين رضيت ؟؟؟ نمشي يعني ؟؟؟؟؟



( حمود ) : يالله له ... ويش تنطر ؟ وانا ويش اقول يعني من ساعه لحد الحين ؟ تبي جمع على ظهرك عفر ؟



سلوم وهو يضرب على راس حمود بالفووووووول حتى رج ليه مخه : يالاخبل يالله عاد عطيناك وجه واجد ... قمت تتفلسف علينا .... صدق ما تنعطا وجه يالاتلح .



حمود وهو يفصخ نعاله الزنوبه ويرميه على سلوم الا من زمان شال عليه ركضه لبيتهم : تعال يا وجه البطه ...... تعال جان فيك خير .... ان ما راويتك جيفه تضربني مرة فانيه .... تعال يالجبان .... ما عليه اصيدك ..... وين بتروح عني يعني ..... يصير خير يا بقعه الزيت .



سلوم شال نعاله وجوده بايديه وطار عليه ركض علشان ما يصيده حمود ويضربه : ههههههههه ...... هههههههههااااااااااي .... ضحكتني والله ...... في احلامك تصيدني يالدبه .



دخل حمود البيت معصب عدل وواصل حده من حركات بقعه الزيت سلوم .... هين يا سلوم خل اصيدك .... براويك منهو هاده حمود الا تضربه وتتفلسف عليه وتهرب بيتكم .



بعد نص ساعه دخلت ام حمود البيت وحصلت حمود سرحان في الصاله .



( ام حمود ) : حمود ..... حمـود ..... حمـــود ..... حمـــود !!!!!!!!!!



( حمود ) : هــــــــا ..... ويش صاير ؟؟؟ منهو مات ؟؟؟ منهو صادوه ؟؟؟ مو انا والله مو مني مو انا لا تاخدوني .



( ام حمود ) : لا بالله ولدي استخف ..... الحمدلله والشكر .... ويش فيك حمدوه ؟؟ ويش صاير في عقلك ؟؟ عفر استخفيت ؟



( حمود ) : افــــــــ .... اشوة ... حسبالي في شي صدق الحين .... ويش تبين اماه ؟؟ مو انتين في بيت ام حسون ... متى رجعتين ؟؟ وبعدين مو انا قايل اليش سالفه الاجازة لا تقولينها لاحد ..... امداش نشرتينها على الفريق كامل ؟؟!!



( ام حمود ) : هـــا ... اااا لا ... هو يعني زلت لسان .... بس قلت لام حسون ... ووو صدقني زلت لسان ... وبعد يعني ه ه هو ..... كانت وياها ام جسوم ... وام صدوق .... وام حلوم ... وام منصور ... وجم مرة يعني ...... بس لا تطمن .... يعني محد بيدري لا تخاف .



( حمود ) : لاااااااااا ... صدق .... من بعد في الفريق ما درى ... ام حسون وام جسوم وام صدو... لا لا تقول تطمن بعد ..... هذا غير الا برى البيت وسمعوا الصوت يلعلع .... شوفي ادا صكوا المدرسه وحبسوا المدير ما اليي شغل انا .



دخل ابو حمود فجاة عليهم الصاله ..... وسمع نص الكلام .



( ابو حمود ) : هــــــا .... ويش اسمع ... مو قلت اليي انتا ورفيقك من الصبح .... ان اليوم رايحين رحله ؟؟؟ اتاري فيك جداب ياللي ماتستحي على وجهك .... وصلت فيك تجدب عليي يا اسود الوجه .... وفي سالفه ثانيه وانا ما ادري فيها ... امشا قدامي ... امشا قدامي الحجرة ..... عندي حساب عسير وياك هناك .... امشا بسرعه .



( حمود ) : لا ابويي ... كـ كـ كـ كنا ... ر ر ر رايحـ ....



( ابو حمود ) : جـــــــــب ..... ولا كلمه وقدامي الحجرة بسرعه اشوف قدامي .



حمود يساسر روحه وهو ميت من الخوف : لا بالله رحنا وطي .... راحت علينا اليوم ...... استر علينا يا رب .



الى اللقاء في الجزء الثالث

من يوميات طالب مفصول

اليكم الجزء الثالث من المسلسل

فمتابعه طيبه

وانتظر ردودكم


الجزء الثالث



قعد يتمشى في الفريق .... ويحوم على بيت ابو عبود .... حزة ظهر وشبه شمس بدل ما يروح يصلي الادمي .... قاعد يترقب وينتظر ..... طلع ابو عبود من بيتهم رايح المسجد .



( ابوعبود ) : ها سلوم حبيبي ... ويش فيك واقف هني في شبه هالشمس ؟



( سلوم ) : ها ... لا ما فيني شي .. بس ضايعه من عندي ربيه قاعد ادورها ... بروح اشتري اليي اسكريم ...... حر قلت ابرد على روحي بهالاسكريمه شوي .



( ابو عبود ) : تعال تعال ..... خل هالربيه عنك تولي وخد من عندي وروح اشتري لك فيها ...... ترى ما بتحصل ربيتك في هالشارع والظهر .... وبعدين تعال ما بتروح تصلي انته لا ؟



( سلوم ) : انا كنت رايح المسجد .... بس قلت بشتري اليي اسكريم اكله على طريقي .... وضاعت ربيتي وقعدت ادورها .



( ابو عبود ) : انزين حصل خير .... خل ربيتك تولي الحين وتعال ويايي المسجد نصلي .... وبعد الصلاة اشتري اليك اسكريم .



( سلوم ) : هـــــا .... لا عمي مشكور ... ما يحتاج .... انته توكل على الله وروح المسجد .... انا بروح البيت بتمسح وبلحقك بعدين .... بس انته روح لا تتاخر على الجماعه .



( ابو عبود ) : على راحتك يا ولدي ..... يالله مع السلامة .



( سلوم ) : الله يسلمك عمي ... مشكور جزاك الله خير ..... " بينه وبين نفسه " : اشوة ... جان الحين رحت فيها ... انا ويش اليي اوقف هالحزة وانا ادري ان عمي بيطلع للصلاة .... صدق الهباله وما تسوي ..... لا مو الهباله قول الحب وما يسوي ..... اااااااه ..... خل اروح وارجع مرة فانيه ..... بعد ما بييئس اليوم " .



وتوه بيتحرك جان يسمع صوت ضحكة رقيقه خفيفه ... ولما التفت صوب الصوت .... لمح شي يتحرك وبسرعه اختفى ومشى عنه .

** في بيت ابو حمود **



( ابو حمود ) : انته ويش سالفتك ويه المدرسه ... ما تقول اليي ؟؟؟ الصبح تقول عندك رحله ورجعت من وقت ... وقايل الى امك عاطينكم اجازة لان استادكم مريض ... بتقول اليي الصدق لا هالعقال على ظهرك .... شوف انا لحد الحين متعامل وياك بالطيب ... فخل النفس عليك طيبه هااااااااااا .



( حمود ) : ابويي .. انا قلت الى امي وما قلت اليك لأن خايف بصراحه منك .... اخاف ما تصدقني ... قمت جدبت عليك ...... وقلت ان عندنا رحله ورجعنا من وقت .



( ابو حمود ) : لا ... صدق ؟؟؟؟ وتبيني اصدق يعني ان المدرسه عاطينك اجازة لان استادكم مريض ؟!! يعني ما يقدرون يجيبون ليكم غيره ؟؟؟ ولا ما في مواد فانيه تدرسونها غير هالمادة ؟ ... علشان يعطلونكم على حسابها ... دور غير هالكلام لاني مو مدمغ وما افتهم تقص عليي ابه .



( حمود ) : صدقني ابويي ...... هم الي قالوا الينا عندكم عطله ...... استادكم مريض وما يقدر يجي المدرسه .



( ابو حمود ) : انزين ويش اسم هاده استادكم المريض ؟



( حمود ) : ا .. ا ... اسمـ .... اسمه استاد خلف .



( ابو حمود ) : انزين يصير خير يا حمود ... انا بمشي اليك هالحجي ..... ومفل ما يقولون .... الحق العيار لباب الدار .... بس يا ويلك ان طلع الي تقوله جدب ... وهداني قلت اليك .

**********



سمع الصوت والتفت اليه بسرعه ... بس ما قدر ياخد ملامح الشخص .... لان كانت حركته سريعه واختفت اول ما طالعها .... بس كانه صوتها ... اي هاده هو صوتها ... وهادي ضحكتها انا متاكد ... هادي فطوم ما غيرها .



( سلوم ) : اخ بس لو شفتها .... هههههههههه حبيبتي والله .... منخشه ورى الباب قاعده تتصوخ كلامنا انا وعمي .... اه بس لو اقدر اتكلم وياها .... قهر بت عمي ولا اتكلم وياها كلمه .



مشى من صوب بيت ابو عبود .... الي هو بيت عمه .... الي كل يوم يروح يوقف جنبه بدون ما احد يشوفه .... يمكن يشوف حبيبه قلبه وبت عمه فطوم .... الي من هو وصغير يلعب وياها الى ما كبروا وافترق عمه في بيت بروحه عنهم ..... ومن ديك الايام لا يشوفها ولا يقدر يكلمها .... لانها خلاص صارت كبيرة .... وما يصير تقعد وياه او تكلمه ... بس وده يقول اليها بس كلمه وحدة ... " احبش " .... وده يقول اليها انه يحبها ... رغم انه يدري انها تدري بحبه لها بس مو متاكد انها تبادله نفس الشعور ... ظل يفكر فيها الين ما وصل بيتهم ... دخل تمسح وصلى .... لانه واجد تاخر عن الصلاة واخد حجة الربيه الي ضاعت منه بس علشان يوقف عند بيت عمه .



وفي جهة ثانيه " بيت ابو حمود "



( حمود ) : ان شاء الله ابويي .... انت بس هدي بالك شوي .... وما يصير الا الخير والا تآمر فيه .... انته ليش معصب .... ما صار يوم ما رحنا فيه المدرسه .



( ابو حمود ) : لا .... واجد اشوفك مستهين بالدراسه .... يا ابوك الدراسه مستقبلك .... وادا ما اهتميت فيها بتضيع ... والا تبي تضيع وتصير جاهل ولا تعرف شي في هالدنيا ؟؟؟



حمود في نفسه : لا رحنا وطي ادا عرف اني مفصول .... ها ويش بسوي ؟؟؟ ما توقعت موقفه بيصير جدي .... قلت بيضربني يوم يومين وبعدين عادي ... هاده عرف اني غايب يوم وسوى جدي .... ما اقول الا الله يستر من باجر ومن اليوم الي بيعرف فيه عن الفصل ... هئ هئ هئ هئ هئ هئ هئ هئ هئ .... بموت خوف بمووووووووت .



( ابو حمود ) : يالله قدامي يالله ...... ادن يالله المسجد قدامي ..... لو عاطينك اجازة عن الصلاة بعد .



( حمود ) : ان شاء الله ابويي ... بروح اتمسح واجيك الحين ... بس دقايق ابويي .



بعد الصلاة رجعوا البيت وتغدوا وعلى الغدى .....



( جلول ) : ابويي اليوم في المدرسه .... سويت محاضرة عن الاباء ... وتكلمت عنك ..... ومدحتك وافتخرت فيك ..... ويش قد المعلمه استانست مني ..... وحطت اليي علامه كامله .



( ابو حمود ) : بارك الله فيش يا بتي .... بس ويش قلتين عني ؟؟؟



( جلول ) : قلت عنك كل خير ..... ابويي انت تستاهل .... والله ما تقصر ويانا بشي ... كل شي توفره لينه .... وتشتغل وتتعب علشانه ..... ولازم احنا نشكرك ونحترمك ...... ونقدر كل التعب الي تتعبه والشغل الي تسويه علشانه ....... يعني الي قلته اليوم قليل بحقك ابويي قليل ..... وفوق هذا واجب .... يعني ما يحتاج تشكروني عليه .



( ابو حمود ) : يا بتي الي اسويه واجب على كل ابو يسويه لولاده .... علشان يعيشهم ويربيهم ..... واهم شي يكونون مرتاحين عنده وما ناقصهم شي .



( ام حمود ) : الله يخليك الينا ان شاءالله ولا يخلينه منك ..... انته منته مقصر بشي .... واحنا مرتاحين وما ناقصنه شي ..... ولا تحاتي .



حمود في نفسه : اي مو ناقصنه شي .... ما يشوفون الناس جيفه عايشه هديله .... تلفونات نقاله وسيارات وفياب ويش حلاوتهم ..... واحنا يا الله بالحسرة نحصل اللقمه ومكان ننام فيه ويه هالبيت الخرابه .... خلني ساكت احسن لان ادا تكلمت بشعلل حريقه مانه قدها في البيت .... وبعدين بطلع انا الغلطان .... وادا ما انطردت من هالخرابه بعد ...... ونمت في الشارع ...... خلني ساكت .



( جلول ) : حمود ويش فيك سرحان ؟؟؟؟ الي ماخد عقلك يتهنى فيه .... ههههههه تفكر في ويش اخويي ؟؟؟



( حمود ) : ها .... لا ما افكر في شي .... اقول الله يطول في عمرك ابويي ..... ويخليك الينا دخر ان شاء الله .



( ام حمود ) : اليوم طايح سوقي ..... ما في احد يعبرني شي .... ما يقولون اهني امنا اهني شمعه البيت .



( الكل ) : ههههههههههههههههههه



( ابو حمود ) : يعني انتون الحين ما تدرون ان امكم تغار مني ؟؟



( جلول ) : افا الحلو يغار من الحلو ...... ما يصير انتوا شموع البيت .... ولولاكم ما نسوى شي .... اماه لا تزعلين ولا اهمش .



( حمود ) : لا عاد اماه انتين شيخه البنات ..... ما بنقول شيخه العجايز ..... " يغمز اليها بعيونه " ..... توش شباب 18 .

***********



لبس ثوبه الجديدة الي مسويها للعيد قبل 3 سنوات ..... صدق قصيرة شويه ...... لكن ما عليه تفي بالغرض ... وهو يكلم نفسه : "ابان رزة وكشوخي " .... اخد عقال ابوه وغترته ..... وعلشان تكمل رزته وشياكته .... كوى الغترة ولبسها وطلع نعال الكيتو الجديد الي خاشه لعيد الفطر الجاي .



طلع من بيتهم وفي نيته يشوفها اليوم يشوفها ... من زمان ما سوى شي ... ما تحرك على شي ..... وفجأة !!!!!!!!!!!

الى اللقاء في الحلقه القادمه

من يوميات طالب مفصول

اتمنى عجبكم الجزء هالمرة

الجزء الرابع


وفجأة جه على باله شنو بيقول اذا راح وقابل عمه .... واه فشيله انا احب بنتك وابي اتزوجها ؟؟؟؟؟؟ اذا ما طردني من البيت وسبل فيني ومسحني بالارض ما اطلع سالم سلوم بقعه الزيت ..... لا لا امبي ادور اليي حجه غيرها ..... على الاقل امبي بس اشوفها .... ما امبي شي اكثر .



سلوم وهو طول الطريق الى بيت عمه .... قاعد يفكر جيفه يدخل بيت عمه ويقدر يكلم فطوم ؟؟؟ يدور على حجه يدور على صرفه .



" وفي بيت ابو حمود "



ام حمود وابو حمود قاعدين في الصاله الصغيرة بالبيت .



( ابو حمود ) : اقول ام حمود .... ويش قال اليش حمود ولدش اليوم بالضبط عن سالفه المدرسه والاجازة هذي ؟



( ام حمود ) : ما قال اليي شي غير عن الي قاله اليك .



( ابو حمود ) : وانتين ويش دراش ويش قال اليي .... علشان تقولين ما قال شي غير ؟



( ام حمود ) : ها ... لا هو لان الصراخ وصل الى تحت وكلامكم كامل سمعته .... من جدي عرفت ويش قال اليك .... اي .



( ابو حمود ) : ام حمود علينا هالحجي .... يعني الحين انتين تبين تقولين ان ما تصوختين من ورى الباب ؟؟؟ ولا سمعتين ويش صار بينا ؟



( ام حمود ) : اوه يا ابو حمود الحين عرفت وخلاص ... بتسويها قضيه اليي يعني .



( ابو حمود ) : لا ما بسويها قضيه ... بس امبيش تبطلين هالعاده الكريهه ... يا ام حمود انتين كبيرة ومرة وفاهمه ... وتعرفين ان التصوخ حرام وطبع شين .... ليش متمسكه فيه ؟

( ام حمود ) : انزين انزين خلاص ..... بنكنسل هالعاده ... فكنا والي يرحم والديك .... ترى راسي يعورني وما اليي خلق هواشك الحين .



( ابو حمود ) : اي من الدوارة من الصبح من بيت الى بيت .... قولي تتعب هالمرة ؟؟!! ما تشوفها الا حامله دفتها وتعسعس في هالبيوت .



( ام حمود ) : انته الظاهر اليوم فيك هواش وتمبي تصبه عليي .... اقوم عنك احسن اليي بواجد .



قامت عنه ام حمود وراحت حجرتها تنام .



( ابو حمود ) : تعالي .... يووووو زعلت .... تعالي وين رحتين ؟؟ الحين انا قلت شي ؟؟ ما قلت شي يزعل ...... بس دلاعه النسوان .



وفي مكان ثاني من بيت ابو حمود .... كان حمود قاعد في حجرته الصغيرة يفكر عند الدريشه ورايح فيها ..... دخلت عليه اخته جليله .... دقت الباب ونادته .... بس هو بعد رايح فيها وسرحان على اخر حد .... دخلت وصكت الباب وراها وراحت لعنده .



( جلول ) : حمود ... حمــود ... حمــــــود ووجع .



( حمود ) : هاااااااااا .... بسم الله الرحمن .... ويش فيش زهقتيني .... ويش تبين ... وبعدين ليش ما دقيتين الباب قبل ما تدخلين ؟



( جلول ) : لا اخويي اليوم مو طبيعي ... دقيت الباب وناديتك ساعتين ونص ... وانته مسهي وسرحان ما ترد عليي ... قلت ادخل اشوف ويش فيك .



( حمود ) : ما سمعتش تدقين الباب ... المهم ويش صاير .... ويش عندش جايه الى حجرتي .... اكيد تمبين شي مني والا انتين ما تجين لله .



************



" ويش ويش ويش ويش اقول ....... ويش اقول الى عمي ... ويش اقول ؟؟؟؟؟؟؟؟ " كان هذا حوار سلوم بقعه الزيت في نفسه طول الطريق ... متحير شنو الخطه الي بتوديه بيت عمه علشان يشوف بت عمه فطوم ..... كل الي يعرفه انه الحين في الشارع رايح الى بيت عمه بس شنو سببه للزيارة ما يدري .... طبعا السبب المزيف الي بيقنع عمه فيه مو السبب الحقيقي .... والسبب الحقيقي معروف ... رايح يشوفها وباي ثمن كان .

( سلوم ) : هييياااااا .... لقيتها .... حصلتها .... اي فاوند ات >> متعلمنها على اخر درس حضره في حصه الانجلينزي .... مسكين على نياته يلقط كلمات واشوة جت في محلها .



( سلوم ) : بروح بيت حمود وبقول اليه يجي ويايي .... بس تعال الحين هو اذا حصلني بيخبصني ضرب ... نسيت اني متهاوش وياه بالصبح ... ولا بعدين يخرب كشختي وما تشوفني فطوم بها >>> الله عاد والكشخه نعال كيتو وثوب جلحه .... لو طقم قميص وبنطلون ونكتاي شنو بيسوي ههههههههه الله يعينه .



( سلوم ) : خل افكر عدل اليوم لازم اشوفها لو شنو صار ..... لحظة مو كانه امي مسويه الينا كباب في البيت ؟؟ ليش ما اروح اجيب اليهم منه .... واقول اليهم ان امي تنغصت اليكم فيه ؟؟؟ والله فكرة ومنها حجه علشان اقعد وياهم وابسط ... ما بقولون شي وعادي .



راح شخط بيتهم ووصل عند امه في المطبخ .



( ام سلوم ) : ده انته ويش فيك اليوم .... مستجن ؟؟؟؟ جاي الينا كانك مصادف وتشاخط علينا ؟؟ ويش وراك يعني ما تمشي مفل الاوادم السنعين ؟؟؟؟ شوي وتخبط في الهريسه وعجينه الكباب .



( سلوم ) : اسف اماه بس ويش اسوي مستعجل واجد .... خلصتين من تسوي الكباب والهريس ؟

( ام سلوم ) : اي خلصت ما تشوفني ... بس قاعده اصفه في الصحون وتعال امبيك في شغله .



( سلوم ) : ويش هالشغله اماه ؟؟ انا بطلع الحين بمر على واحد من ربعي .



**********



( جلول ) : لا مو اول ما تقول اليي ليش هالايام كله سرحان وبس .



( حمود ) : لا ما فيني شي بس تعبان شوي .... خبرش المدرسه ما ترحم .... الواجبات في صوب والاختبارات في صوب ... وغير النشاطات والدروس المعقده ..... صراحه قمت احاتي انا اخاف ارسب هالسنه .



( جلول ) : لا حمود انته شاطر وما بترسب .... بس حط بالك على الدروس ... وراجع اول باول .... واذا ما فهمت شي تعال قول اليي اني بفهمك اياه .... واهم شي تتكل على الله في امورك .



( حمود ) : ونعم بالله ... ان شاءالله ابيض وجهكم هالسنه .



( جلول ) : الحين اقدر اطمن عليك واقول ما فيك شي .... خوفتني صراحه هالايام كله اشوفك سرحان قلت فيك هم وشايله في قلبك ..... اثاري تحاتي الدراسه .... وانا اختك لا تخاف من جد وجد ومن زرع حصد .



( حمود ) : تخافين عليي جلول ؟؟؟



( جلول ) : اي طبعا .... انته اخوي الصغير والوحيد بعد .... جيفه ما تمبيني اخاف عليك ؟؟؟؟ المهم خليتني انسى حق ويش جايه اليك اني .

( حمود ) : اي صح انا بعد نسيت ... ان شاءالله خير .... وما تمبين اروح اشتري اليش شي من البراده ؟



( جلول ) : ههههههههههههه .... ما قلت اليك انته شاطر ودكي .... ويش دراك ان امبيك تروح تشتري اليي .... ما يفهمها الا الشاطر والدكي .



( حمود ) : والله انا اخوش واعرفش زين .... ما تجين حجرتي وتصبغين فيني وحمود حمود الا اذا تبين شي ... وبما ان في ايدش فلوس اكيد تبيني اشتري اليش شي .



( جلول ) : اي عاد حمود انته الا تفهمني زين والله ..... امبيك تروح تشتري اليي فايل ازرق من البراده .



( حمود ) : انزين بروح بس جم تعطيني ؟



( جلول ) : بل بل بل بل ما اقدر عليك ...... مادي درجه اولى .... بعطيك ربيه زين ؟



( حمود ) : هو مو زين .... بس انا رحيم وكريم بقبلها ليش هالمرة بس .



طلع حمود يشتري الى اخته الي تمباه من البراده .



************



" وفي مكان ثاني الي هو بيت سلوم "



( ام سلوم ) : لا ما باخرك عن ربعك .... بس امبيك تودي الى بيت عمك صحن هريس وصحن كباب ... فشيله من زمان ما نودي اليهم شي ؟



انشق حلق سلوم من الفرحه .... الدنيا ما شالته لما قالت اليه امه الطلب ....... اشوة ان جات منها وما جت مني ..... على الاقل ما تنقلب عليي فضيحه واحراج .



( سلوم ) : افا بس افا .... انا الا اخلي ربعي يولون واخلي طوايف ربعي بعد .... كل شي والا الوالده ... وكل شي ولا فطوم .

( ام سلوم ) : ويش تقول ؟



( سلوم ) : هاااااا ..... لا لا لا لا اقول كل شي ولا بيت عمي ... صدق ذكرتيني فيهم من زمان ما نزورهم .... فيش الخير امي والله تذكرينهم بشي من تحت ايدش .



( ام سلوم ) : انزين هاك جود الصحون ولا يتكسرون ..... سمتهم عدل لا يطوحون من عندك في الشارع ..... وسلم عليهم كامل .



طلع سلوم من بيتهم وضبط كشخته المصونه وهو حامل الصحون بحماله .... اي بعد كل شي ولا بيت العم ..... بس يا فرحه ما تمت ..... والحظ الاعوج مهما صار بيظل اعوج .... وحلاوة وجه سلوم ما يحلى اليه الا الحظ الاعوج ...... اخ بس خسارة هالكشخه والتزقرت .... وخسارة كواي الغترة ولبس ثوب العيد .



شنو الي راح يصير ويخرب على سلوم ؟؟؟

وصدق بروح بيت عمه وبيوصل لو لا ؟؟

يمكن في شي راح يعرقل اليه وما يوصل بيت عمه سالم بكشخته ؟



كل هذا راح تعرفونه في الجزء الخامس

واضافه الى احداث جديده وشخصيات جديده

ومقالب جديده

من يوميات طالب مفصول مع العفريت الازرق

تقبلووووا تحياتي

بارك الله فيك أخي

موضوع رائعـٌ حقاٌ

ننتظر جديدكـٌ وأبداعاتكـٌ الرائعة

يسلموااا حبيبي
[ندعوك للتسجيل في المنتدى أو التعريف بنفسك لمعاينة هذه الصورة]